Reti Hari Gawai Dayak – Iban Language-

Posted: May 28, 2009 in perayaan

Dikarang Ulih Futurist

Asal Hari Gawai Dayak

Peremisi Hari Gawai Dayak diungkupka ngagai bala asal Dayak di menua Sarawak; baka bansa Iban, Bidayuh, enggau mayuh sub-ethnics ari Orang Ulu – Kayan, Kenyah, Kelabit, Murut, enggau mayuh agi ti enda ulih ditiuka ba ditu. Sejarah Hari Gawai Dayak ulih dipansik pulai ngagai taun 1957 kelia. Pengerami Hari Gawai Dayak dipejadika (gazetted) nyadi sebengkah ari Hari besai ba menua Sarawak kena 25 September, 1964. Beduduk ari nya, Hari Gawai Dayak ti keterubah diintu kena 1 Jun, 1965. Pengudah ari nya, iya lalu diintu tiap taun sampaika hari tu.

Reti Gawai

Reti leka jaku Gawai sama enggau pengerami. Nya mih kabuah enti orang bisi rami disebut kitai baka tu – munyi ti begawai. Maya ngintu Hari Gawai mayuh bendar pengawa diaduka beserimbai enggau pengerami nya. Sigi batang pengawa iya nya meri besai terima kasih ngagai Tuhan tauka Petara laban udah bulih asil ari kereja bumai betaun.

Simpulka jaku pandak, pengerami nya tadi dikena meri terima kasih ngagai semengat padi. Pia mega, pengerami tu dikena minta awakka dalam taun baru ti deka datai sama bulih padi sama pemayuh tauka lebih agi ari taun ti udah. Semua perengka dikena bumai nempalai nyengkaum batu panggul sereta enggau keresa kena kereja berat lalu disengkilung ngena pua kumbu dalam pandung ranyai. Tuju pengawa nya awakka semua perengka ti dikena bekereja nya tadi tau enda mai pulaika penusah tauka bebadi. Chara ngintu nya tadi nitihka pengarap. Sida ti udah megai pengarap Kristian ngintu ngena chara sembiang. Sida ti agi pengarap adat asal ngintu ngena chara miring.

Maya Hari Gawai, mayuh mega pengawa bukai diaduka orang. Bisi mega orang sabung jadi nyerumba Hari Gawai. Kelimpah ari nya, mayuh mega main enggau adat asal dibantaika kena ngerami malam baka bepantun, ngajat, sereta gagai enggau uti ti bukai. Pengerami belabuh kena lemai hari 31 Mei alai semua raban diri sebilik sama makai begempuru (family union). Ba sekeda menua, pengawa tu dikumbai orang ‘besapi tuai.’ Raban ti pengabis biak dalam ruang bilik berengkah nyapi raban ti pengabis tuai lalu beturut datai ba iya ti pengabis biak nya empu. Tuju pengawa tu awakka tau gayu-guru baka iya ti tuai dalam ruang bilik nya. Tengah malam nya mega bisi ngirup ai pengayu. Udah nya ditangkanka mayuh main enggau adat asal kena ngerami malam datai ka hari tawas. Chara ngintu Hari Gawai engka bisi lain mimit nitihka ai enggau bagi menua sebengkah enggau sebengkah. Ba alai genturung orang mayuh agi diau, bisi mega orang ngaduka pekit kumang enggau keling. Maya Hari Gawai mega orang sigi nerima penatai temuai ari pupu raban bansa ti datai ngabang. Mayuh bansa pemakai asal enggau iya ti baru dibantaika temuai. Tuak mega sigi diberika pengabang ti bisi datai.

20-50 Taun Ti Deka Datai

Kemaia hari tu mayuh bala anembiak udah bejalai sebelah nengeri ketegal kereja kena ngidupka ruang bilik diri empu. Ketegal kereja ti jauh di menua urang, sekeda ari bala kitai enda ulih mulaika diri enti maya Hari Gawai Dayak. Belanja deka mulaika diri tau mai ungkus beratus. Enti mayuh anak, belanja mulaika diri sebilik tentu tau mai ungkus beribu. Mayuh mega orang udah pindah diau mendam ba nengeri ketegal ngiga peluang dikena ngidupka diri ti lebih manah agi. Dalam kandang 30 taun ti udah lalu, migration ari menua petisir ngagai nengeri pan nyau makin nambah. Enti kitai mandingka enggau sida bansa Cina, tau dikira nyau deka abis menua ba dunya tu alai bala sida iya migrate ngiga peluang pengidup baru ba menua bukai. Nya alai ba mayuh menua, kitai bisi meda endur ti disebut orang China Town. Ba nengeri Johor mayuh bendar bala ari Sarawak udah bekereja sereta diau mendam ba genturung Bandaraya Johor Bahru dalam 30 taun ti udah lalu. Beduduk ari nya engka nadai salah enti perintah setuju meri nama endur nya dikumbai Sarawak Town tauka Iban Town. Nitihka banci ari perintah, enda kurang ari 40,000 (need to be verified) bala Iban bisi ditemu bekereja tauka diau mendam ba endur nya. Sekeda ari sida iya bekereja di Singapore tang berundang ari Johor Bahru tiap hari.

Chara ngintu Hari Gawai Dayak ba nengeri diatu pan nyau udah bisi jauh lain mimit ari ba rumah panjai. Kabuah pia laban pengidup diau di nengeri udah kena pangka gelumbang dunya nadai sempadan (globalization). Beduduk ari nya, adat asal mayuh pupu bansa nyau udah bechampur (assimilation). Ulih tauka enda adat asal lama baka pantun, ajat, timang, kuntau, sereta mayuh ti bukai dipeturunka datai ba tubuh sida anembiak rebak baru ila? Pekara tu ti balat bendar mai pengirau ati ba sida ti nyadi tuai raban bansa diatu.

Kati ku gaya Hari Gawai diintu anembiak rebak baru ila dalam timpuh 20-50 taun ari diatu – kati agi bisi sama ba senentang chara sida iya ngintu enggau beratika reti leka jaku Gawai ketegal balat bai ubah arus pemansang? Aram mih kitai sama ninjau pekara tu beserimbai enggau musin Gawai tu.

Selamat Hari Gawai Dayak 2009 – arapka semua kitai gayu-guru, gerai-nyamai, chelap-lindap, lalu mujur dalam semua pengawa.

Sumber : mansangmaju.com

Iklhas Bungai Pengrindu ,

Don’t forget to Follow / Subscribe Bungai pengrindu

Ngembuan pengrindu? Taip meh email nuan dibaruh tuk, ambik ke Burung Pengrindu madah ke berita terbaru ari bungai pengrindu ke dalam email nuan.:

Taipkan email anda untuk Subscribe posting terbaru BP..

Artikel terbaru ari Bungai Pengrindu deka dianjung Burung Pengrindu FeedBurner

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s